கூகுள் விளம்பரத்தில் உங்கள் புகைப்படம்

கூகுள் நிறுவனம் தனது சேவை விதிமுறைகளில் (Terms of Service) சில முக்கிய மாற்றத்தை செய்துள்ளது. இதன்படி கூகுள் விளம்பரங்களில் உங்கள் புகைப்படத்தை கூகுள் பயன்படுத்த முடியும். இதற்கு Shared Endorsements என்று பெயரிட்டுள்ளது.

இதுபற்றிய அறிவிப்பு உங்கள் Google+ Notifications பகுதியிலும், மின்னஞ்சலிலும் வந்திருக்கும்.

இது கிட்டத்தட்ட பேஸ்புக் விளம்பரம் போன்றது. நீங்கள் எந்த தயாரிப்புகளையாவது ப்ளஸ் ஒன் செய்திருந்தாலோ, கூகுள் ப்ளஸ்ஸில் பகிர்ந்திருந்தாலோ அல்லது விமர்சனம் (Review) செய்திருந்தாலோ அந்த தயாரிப்பு பற்றிய விளம்பரங்கள் உங்கள் கூகுள் ப்ளஸ் சர்க்கிளில் உள்ளவர்களுக்கு அல்லது உங்களை தனது சர்க்கிளில் சேர்த்திருப்பவர்களுக்கு உங்கள் புகைப்படத்துடன் காட்டும்.

இதனால் கூகுளுக்கு என்ன பயன்?

பேஸ்புக் வந்த பிறகு கூகுள் விளம்பரதாரர்கள் பலர் பேஸ்புக் விளம்பரங்களுக்கு மாறிவிட்டனர். காரணம் சாதாரண விளம்பரங்களைவிட பேஸ்புக் தளத்தில் இருக்கும் சமூக விளம்பரங்கள் (Social Ads) அதிக வாடிக்கையாளர்களை பெற்றுத்தரக்கூடியது. இதற்கு போட்டியாக கூகுள் நிறுவனமும் தனது சமூக இணையதளமான கூகுள் ப்ளஸ் தளத்தை பயன்படுத்துகிறது.

இதில் கூகுளுக்கு உள்ள அதிக நன்மை என்னவென்றால், பேஸ்புக் தனது விளம்பரங்களை பேஸ்புக் தளத்தில் மட்டும் தான் வைக்க முடியும். ஆனால் கூகுளுக்கு பல்வேறு தளங்கள் இருக்கிறது. தான் பறிக்கொடுத்த விளம்பரதாரர்களை மீட்டெடுக்கும் முயற்சியாக கூட இதைக் கருதலாம்.

இதைத் தடுக்க முடியாதா?

மேலே சொன்னபடி உங்கள் புகைப்படம் கூகுள் விளம்பரங்களில் தெரியக் கூடாது என்றால் கீழே உள்ள முகவரிக்கு சென்று "Based upon my activity, Google may show my name and profile photo in shared endorsements that appear in ads." என்ற இடத்தில் உள்ள கட்டத்தில் டிக்கை எடுத்துவிட்டு Save கொடுங்கள்.

http://bit.ly/160dZfd

கவனிக்க: தற்போது Default-ஆக அந்த கட்டத்தில் டிக் இருக்காது. அதனால் தற்போது எதுவும் செய்ய வேண்டாம். ஆனால் வரும் நவம்பர் 11-ஆம் தேதி தானாக அதில் டிக் செய்யப்பட்டுவிடும். அப்போது வந்து டிக்கை எடுத்தால் போதும்.