பதில் - பிரச்சனை - மன்னிப்பு

'கற்போம்' பிரபுகிருஷ்ணாவும், நானும் இணைந்து தொழில்நுட்பம் தொடர்பான கேள்வி-பதில் தளமாக பதில் தளத்தை உருவாக்கினோம். இது பற்றி கேள்வியும் நீங்களே! பதிலும் நீங்களே! என்ற பதிவில் சொல்லியிருந்தேன். தற்போது அந்த தளத்தில் பிரச்சனை ஏற்பட்டுள்ளது.

பதில்:

பதில் தளத்தை உருவாக்கியது இரண்டு நபர்கள் என்றாலும் அதில் சிறப்பாக செயல்பட்டதற்கு எவ்வித லாபநோக்குமின்றி தொடர்ந்து பங்களித்து வந்த உங்களைப் போன்ற நண்பர்கள் தான் முக்கிய காரணம். பதிவுலகில் இல்லாத பல நண்பர்கள் கேள்விகளுக்கு பதில் அளித்து வந்தனர்.

பிரச்சனை:

பதில் தளம் குறிப்பிட்ட ஹோஸ்டிங் மூலம் இயங்கி வந்தது. நேற்று அந்த ஹோஸ்டிங் தளத்தில் ஏற்பட்ட செர்வர் குளறுபடியால் அதில் இயங்கி வந்த பதில் தளம் உள்பட சில தளங்கள் முடங்கியது. பிரச்சனை என்னவென்றால் பதில் தளத்தை நாங்கள் பேக்கப் (Back-up) எடுத்திருக்கவில்லை. இதனால் இதுவரை பதில் தளத்தில் வெளியான 2000-க்கும் மேற்பட்ட கேள்வி-பதில்களையும் நாங்கள் இழந்துவிட்டோம்.

மன்னிப்பு!

இந்த தவறுக்கு பொறுப்பேற்று பதில் தள உறுப்பினர்களிடம் மன்னிப்பு கேட்கிறோம்! காரணம் ஐநூறுக்கும் மேற்பட்ட உறுப்பினர்கள் செயல்பட்டு வந்த தளத்தை நாங்கள் பேக்கப் எடுத்திருக்க வேண்டும். அப்படி எடுக்காதது எங்கள் தவறு. இவர்களின் உழைப்பு எங்கள் கவனக்குறைவால் வீணாகிவிட்டது.

தற்போது Cache முறையில் முடிந்தவரை இதுவரை வெளியான கேள்வி-பதில்களை பிரதி எடுத்துக் கொண்டிருக்கிறோம். இறைவன் நாடினால் விரைவில் புதிய தோற்றத்தில் பதில் தளத்தை செயல்படுத்த முயற்சிக்கிறோம்.