கூகிள் பஸ்ஸிற்கு Good Bye!

பேஸ்புக், ட்விட்டர் போன்ற சமூக வலைப்பின்னல் தளங்களுக்கு போட்டியாக கூகிள் தளம் கடந்த வருடம் அறிமுகப்படுத்திய சமூக வலைப்பின்னல் கருவி தான் கூகிள் பஸ் (Google Buzz). ஆனால் அது அறிமுகமான சில நாட்களிலேயே அடிவாங்கத் தொடங்கியது.


கூகிள் பஸ் தொடக்கத்திலேயே அடிவாங்க காரணம், அதன் தனியுரிமை அமைவுகள் (Privacy Settings). கூகிள் பஸ் தனி தளத்தில் செயல்படவில்லை. ஜிமெயிலில் (Gmail) ஒரு பகுதியாக தான் செயல்பட்டது. ஜிமெயிலில் சமீபத்தில் நீங்கள் மெயில் அனுப்பியவர்களின் பட்டியலையும், அரட்டை அடித்தவர்களின் பட்டியலையும் உங்களை பின்தொடர்பவருக்கு காட்டிக் கொடுத்தது. மேலும் பஸ்ஸை செயல்நீக்கம் (Disable) செய்யும் வசதியும் இல்லை. இதனால் உலகெங்கும் கடும் எதிர்ப்பை சந்தித்தது கூகிள். பிறகு அதனுடைய தனியுரிமை அமைவுகளை மாற்றி அமைத்தது. மேலும் அதனை செயல்நீக்கம் செய்யும் வசதியையும் தந்தது. [அப்பொழுது பஸ்ஸை செயல்நீக்கம் செய்த நான் இன்று அதனை வழி அனுப்புவதற்காக செயலாக்கம் (Enable) செய்துள்ளேன். :) :) :) ]


கூகிள் பஸ்ஸில் செய்த தவறிலிருந்து மீண்டு தற்போது கூகிள் ப்ளஸ் தளத்தை வெற்றிக்கரமாக அறிமுகப்படுத்தியுள்ளது. கூகிள் ப்ளஸ் தளத்திலேயே கூகிள பஸ் வசதியையும் இணைத்தது. தற்போது கூகிள் ப்ளஸ்ஸில் முழு கவனம் செய்வதால் கூகிள் பஸ் வசதியை மூடுவதற்கு முடிவெடுத்துள்ளது. இன்னும் சில வாரங்களில் இது நிரந்தரமாக மூடப்பட்டுவிடும். ஆனாலும் உங்கள் பழைய பஸ் செய்திகளை கூகிள் ப்ளஸ் தளத்தில் பார்க்கலாம். மேலும் அத்தகவல்களை நீங்கள் பதிவிறக்கம் செய்துக் கொள்ளலாம். பதிவிறக்கம் செய்ய இங்கே க்ளிக் செய்யவும்.


நாளுக்கு நாள் புதிய வசதிகளை அறிமுகப்பத்திவரும் அதேவேளையில் தனது பல்வேறு வசதிகளை மூடிவருகிறது கூகிள் தளம். மூடப்போகும் வசதிகளில் சில:


1. Code Search - இணையத்தில் உள்ள திறந்த மூல குறியீடுகளை (Open Source Codes) தேடுவதற்கு பயன்பட்ட Code Search என்னும் தேடுபொறி வசதி. இது 2012, ஜனவரி 15ஆம் தேதி மூடப்படுகிறது.


2. Jaiku - இது ட்விட்டர் போன்ற Micro Blogging தளம். இதனை 2007-ஆம் வருடம் கையகப்படுத்தியது கூகிள். இதுவும் 2012, ஜனவரி 15ஆம் தேதி மூடப்படுகிறது.

3. Google Labs - கூகிளின் புதிய திட்டங்களை (Projects) சோதனை செய்வதற்காக பயன்படுத்தப்பட்ட கூகிள் லேப் தளம் இன்று மூடப்பட்டுவிட்டது.

4. Aardvark - இது சமூக தேடுபோறியாகும் (Social Search Engine). இங்கு நம்முடைய கேள்விகளை கேட்கலாம். பதில் தெரிந்தவர்கள் பதில் அளிப்பார்கள். Yahoo Answers தளம் போன்று. இந்த தளத்தை 2010-ஆம் ஆண்டு கையகப்படுத்திய கூகிள் தளம் விரைவில் இதனை மூடப்போகிறது.


5. Google Pack - பல்வேறு பயனுள்ள மென்பொருட்களை பதிவிறக்கம் செய்ய பயன்பட்டு வந்த கூகிள் பேக் தளம், இவ்வசதியை நிறுத்திவிட்டது. ஆனால் முக்கிய மென்பொருட்களை பதிவிறக்கம் செய்வதற்கான சுட்டியை தந்துள்ளது. அதனை பார்க்க இங்கே க்ளிக் செய்யவும்.


இன்னும் நிறைய வசதிகளை மூட முடிவெடுத்துள்ளது. 


கூகிள் பஸ் மூடலால் அதிகம் வருத்தப்படுவது தமிழ் பதிவர்கள் தான் என நினைக்கிறேன். இனி கூகிள் பஸ்ஸிற்கு Good Bye சொல்லுவோம்!