TechMinar.com - கடலில் ஒரு துளி

இணையம் என்னும் சமுத்திரத்தில் ஒரு சிறு துளியாய் சங்கமித்துள்ளது Techminar.com என்னும் புதிய ஆங்கில தளம். இது ப்ளாக்கர்  உதவிக் குறிப்புகள் மற்றும் சமீபத்திய தொழில்நுட்பச் செய்திகள் பற்றிய தளமாகும். இந்த புதிய தளத்தை பற்றி இப்பதிவில் பார்ப்போம்.
 
 Techminar.com தளத்தை உருவாக்கியது வேறு யாரும் இல்லை, நான் தான். இது நான் புதிதாய் உருவாக்கியிருக்கும் ஆங்கில தளம். கிட்டத்தட்ட ப்ளாக்கர் நண்பன் தளத்தின் ஆங்கில மொழிபெயர்ப்புதான். இதில் ப்ளாக்கர் டிப்ஸ் பற்றியும், தொழில்நுட்பச் செய்திகளைப் பற்றியும் எழுதும் எண்ணம் உள்ளது. அதற்காகவே "Blogging Tips and Technology News" என்று Caption சேர்த்துள்ளேன். மேலும், ஆங்கில தளங்களுக்கு மட்டுமே பயன்படும் சில விசயங்களை பற்றியும் எழுத உள்ளேன்.

சொந்த டொமைனில் வெப் ஹோஸ்டிங் மூலம் ஆங்கில  தளம் ஒன்று உருவாக்க வேண்டும் என்ற எண்ணம் நீண்ட நாட்களாக இருந்தது. வெப் ஹோஸ்டிங் என்றால் கொஞ்சம் பணம் செலவிட வேண்டும் என்பதாலும், எதைப் பற்றி எழுதுவது? என்று தெரியாததாலும் யோசித்துக் கொண்டே இருந்தேன். தற்போது ப்ளாக்கர் நண்பனில் எழுதுவதையே எழுதலாம் என்று முடிவெடுத்தேன். சகோ. பலே பிரபு அவர்களின் Custom Domain பற்றிய தொடரை படித்த பிறகு, வெப் ஹோஸ்டிங்கிற்கு பதிலாக கூகிள் மூலம் டொமைன் வாங்கிவிட்டேன்.

ஆட்சென்ஸ் (Adsense):

ஆங்கில தளம் உருவாக்கியதற்கு காரணமே விளம்பரங்களுக்காக தான். ஆனால் கூகிள் ஆட்சென்ஸ் பெற வேண்டுமானால் பல்வேறு விதிகள் இருப்பதால் மூன்று மாதங்களுக்கு பிறகு அதில் விண்ணப்பிக்கலாம் என்று எண்ணியிருந்தேன். இடையில் ஒரு சகோதரருக்கு ஆட்சென்ஸ் பற்றி விளக்கம் கொடுத்த போது, எதார்த்தமாக விண்ணப்பித்தேன். அந்த விண்ணப்பம் நிராகரிக்கப்படும் என்று தான் நினைத்தேன், ஆனால் மறுநாளே விண்ணப்பம் ஏற்றுக்கொள்ளப்பட்டதாக மெயில் வந்தது. அது சமயம் ப்ளாக் பெற்ற மொத்த பார்வைகள் (Pageviews) 200-க்கும் குறைவே. அது மட்டுமின்றி ஒரு பதிவு மட்டுமே இருந்தது. இதை பெருமைக்காக சொல்லவில்லை. ஆட்சென்ஸ் வாங்குவது எளிது என்பதற்காகவே சொன்னேன். ஆட்சென்ஸ் தமிழ் தளங்களுக்கு இல்லை என்பதை கவனத்தில் கொள்ளவும்.

ஆட்சென்ஸ் விதிகளில் முக்கியமான ஒன்று, விளம்பரங்களை க்ளிக் செய்யுமாறு வாசகர்களிடம் சொல்லக் கூடாது. நான் உங்களிடம் கேட்பது என்னவென்றால், அந்த விளம்பரங்கள் உங்களுக்கு உபயோகமானதாக இருந்தால் மட்டுமே க்ளிக் செய்யவும். எனக்காக க்ளிக் செய்ய வேண்டாம். அவ்வாறு செய்வது நாம் அவர்களை ஏமாற்றுவது போல் ஆகும்.

Techminar என்றால் என்ன?

இது நான் கனவில் தேர்ந்தெடுத்த பெயர். இது பிடித்திருந்ததால் இதனையே வைத்து விட்டேன். பெயர் வைத்த பிறகு தான் இதற்கு அர்த்தமும் வைத்தேன்.

Tech - Technology - தொழில்நுட்பம்

Minar - Light House or Tall Spire - கலங்கரை விளக்கம் அல்லது உயரமான சிகரம்
[Minar என்னும் வார்த்தை Minaret என்னும் அரபி மொழியிலிருந்து வந்ததாகும்]

 உயரமான கட்டிடங்கள் ஒரு கல்லிலிருந்து தொடங்கப்படுகிறது. தற்போது ஒரு கல்லை மட்டுமே வைத்துள்ளேன். இறைவனின் உதவியால் அது மேலும் உயரமாகும் என்ற நம்பிக்கையுடன்..

தங்களுக்கு விருப்பமிருந்தால் ஒரு முறை வருகை தரவும்.

முகவரி:  www.techminar.com